ଓଡ଼ିଆ ଝିଅ ଝାଡ଼ଖଣ୍ଡରେ ବିଧାୟିକା

ମୋଟିଭି ଓଡିଶା ବ୍ୟୁରୋ :

ଓଡ଼ିଆ ଝିଅ ଝାଡ଼ଖଣ୍ଡରେ ବିଧାୟିକା ଭାବେ ନିର୍ବାଚିତ ହୋଇଛନ୍ତି। ମଙ୍ଗଳବାର ନିର୍ବାଚନୀ ଫଳାଫଳ ପ୍ରକାଶ ପାଇବା ପରେ ଏହି ତଥ୍ୟ ସାମ୍ନାକୁ ଆସିଛି। ଏହି ଝିଅ ଜଣକ ହେଉଛନ୍ତି ଝାଡ଼ଖଣ୍ଡର ପୂର୍ବତନ ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କ ସ୍ତ୍ରୀ କଳ୍ପନା ମୁର୍ମୁ ସୋରେନ। ସେ ଗାଣ୍ଡେ ବିଧାନସଭା ଆସନରୁ ଝାଡ଼ଖଣ୍ଡ ମୁକ୍ତି ମୋର୍ଚ୍ଚା (ଜେଏମଏମ) ଦଳରୁ ପ୍ରାର୍ଥୀ ହୋଇ ନିର୍ବାଚିତ ହୋଇଛନ୍ତି।

ଗାଣ୍ଡେ ବିଧାୟକ ସର୍ଫରାଜ ଅହମ୍ମଦ ଗତବର୍ଷ ଡିସେମ୍ବରରେ ଇସ୍ତଫା ଦେବା ପରେ ଏହି ଆସନରେ ବିଧାୟକ ପଦ ଖାଲି ପଡ଼ିଥିଲା। ସର୍ଫରାଜ ରାଜ୍ୟସଭା ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବା ଲାଗି ଇସ୍ତଫା ଦେଇଥିଲେ। ଚଳିତ ନିର୍ବାଚନ ସମୟରେ ଏଠାରେ ଉପନିର୍ବାଚନ ଅନୁଷ୍ଠିତ ହୋଇଥିଲା। ଜମି ଦୁର୍ନୀତି ମାମଲାରେ ହେମନ୍ତ ସୋରେନ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ଦ୍ୱାରା ଗିରଫ ହୋଇ ଜେଲ ଯିବା ପରେ କଳ୍ପନା ରାଜନୀତିରେ ପାଦ ଦେଇଛନ୍ତି। ଏଥିସହିତ ପ୍ରଥମ ଥର ପ୍ରତିଦ୍ୱନ୍ଦ୍ୱିତା କରି ସଫଳ ମଧ୍ୟ ହୋଇଛନ୍ତି।

ଉପନିର୍ବାଚନରେ ସେ ତାଙ୍କ ନିକଟତମ ପ୍ରତିଦ୍ୱନ୍ଦ୍ୱୀ ତଥା ବିଜେପି ପ୍ରାର୍ଥୀ ଦିଲୀପ କୁମାର ବର୍ମାଙ୍କୁ ୨୭ ହଜାର ୧୪୯ ଖଣ୍ଡ ଭୋଟରେ ପରାଜିତ କରିଛନ୍ତି। କଳ୍ପନା ୧ ଲକ୍ଷ ୯ ହଜାର ୮୨୭ ଖଣ୍ଡ ଭୋଟ ପାଇଥିବାବେଳେ ଦିଲୀପ ୮୨ ହଜାର ୬୮୭ ଖଣ୍ଡ ଭୋଟ ପାଇଛନ୍ତି। ଏହି ଆସନରେ ମୋଟ ୧୧ ପ୍ରାର୍ଥୀ ପ୍ରତିଦ୍ୱନ୍ଦ୍ୱିତା କରୁଥିଲେ ହେଁ ଜେଏମଏମ ପ୍ରାର୍ଥୀ କଳ୍ପନା ଏବଂ ବିଜେପି ପ୍ରାର୍ଥୀ ଦିଲୀପଙ୍କ ମଧ୍ୟରେ ତୀବ୍ର ପ୍ରତିଦ୍ୱନ୍ଦ୍ୱିତା ହୋଇଥିଲା।