ଓଡିଶାର ୬ଟି ସହରରେ ଖୋଲିବ ୧୯ଟି ଘରୋଇ ଏଫ୍ଏମ୍ ଚ୍ୟାନେଲ୍

ମୋ ଟିଭି ଓଡିଶା ବ୍ୟୁରୋ : କେନ୍ଦ୍ର ସରକାର ଦେଶର ଅପହଞ୍ଚ ଇଲାକାକୁ ଯୋଡିବା ନିମନ୍ତେ ତଥା ସେଠାକାର ଲୋକମାନଙ୍କୁ ସୂଚନା ଦେବା ଲକ୍ଷ୍ୟରେ ୨୩୪ଟି ନୂଆ ସହରରେ ୭୩୦ଟି ଘରୋଇ ଏଫ୍ଏମ୍ ଚ୍ୟାନେଲ୍ ଖୋଲିବା ନିମନ୍ତେ ଆଜି ଇ-ନିଲାମ ପ୍ରସ୍ତାବକୁ ଅନୁମୋଦନ କରିଛି। ଏଥିପାଇଁ ରିଜର୍ଭ ମୂଲ୍ୟ ୭୮୪.୮୭ କୋଟି ଟଙ୍କା ରଖାଯାଇଛି। ଏହି ନୂଆ ୭୩୦ ଘରୋଇ ଏଫ୍ଏମ୍ ଚ୍ୟାନେଲ୍ ମଧ୍ୟରେ ଓଡିଶାର ୬ଟି ସହରରେ ୧୯ଟି ଘରୋଇ ଏଫ୍ଏମ୍ ଚ୍ୟାନେଲ୍ ଖୋଲିବ।

ବାଲେଶ୍ବର ଜିଲ୍ଲାରେ ୩ଟି ଘରୋଇ ଏଫ୍ଏମ୍ ଚ୍ୟାନେଲ ଖୋଲିବାକୁ ଥିବା ବେଳେ ବାରିପଦାରେ ୩ଟି, ବ୍ରହ୍ମପୁରରେ ୪ଟି, ଭଦ୍ରକରେ ୩ଟି, ପୁରୀରେ ୩ଟି ଏବଂ ସମ୍ବଲପୁରରେ ୩ଟି ଘରୋଇ ଏଫ୍ଏମ୍ ଚ୍ୟାନେଲ ଖୋଲିବ। ମାତୃଭାଷାରେ ସ୍ଥାନୀୟ ବିଷୟବସ୍ତୁକୁ ପ୍ରୋତ୍ସାହିତ କରିବା ଏବଂ ନୂତନ ନିଯୁକ୍ତି ସୁଯୋଗ ସୃଷ୍ଟି କରିବା ଏହି ପଦକ୍ଷେପର ଲକ୍ଷ୍ୟ। ସୂଚନା ଓ ପ୍ରସାରଣ ମନ୍ତ୍ରୀ ଅଶ୍ୱିନୀ ବୈଷ୍ଣବ କହିଛନ୍ତି ଯେ କ୍ୟାବିନେଟ ନିଷ୍ପତ୍ତି ଏଫଏମ ରେଡିଓକୁ ଟାୟାର ୨ ଏବଂ ଟାୟର ୩ ସହରକୁ ନେଇଯିବ। ସେ କହିଛନ୍ତି ଯେ ଏହି ପ୍ରକଳ୍ପ ସ୍ଥାନୀୟ ପ୍ରତିଭାଙ୍କ ଉପରେ ଧ୍ୟାନ ଦେବ।