ଗୋଚାଲାଣ ବେଳେ ପୋଲିସ ଉପରକୁ ଗୁଳିମାଡ

ମୋ ଟିଭି ଓଡିଶା / କେଉଁଝର : ଗୋଚାଲାଣ ଅଟକାଇବା ବେଳେ ପୋଲିସ ଉପରକୁ ଗୁଳିମାଡ । ଗୁଳି ଫୁଟାଇଲେ ଗୋରୁ ମାଫିଆ । ପୋଲିସର ପାଲଟା ଜବାବରେ ଜଣେ ମାଫିଆ ଆହତ ହୋଇଛି । ଆଜି (ରବିବାର) କେନ୍ଦୁଝର ଜିଲ୍ଲା ହରିଚନ୍ଦନପୁର ଥାନା ଅନ୍ତର୍ଗତ କୁଲାଢାଙ୍କୁଣି ଅଞ୍ଚଳରେ ଏହି ଘଟଣା ଘଟିଛି । ପୋଲିସ ଓ ଗୋରୁ ମାଫିଆ ମୁହାଁମୁହିଁ ହୋଇଛନ୍ତି । ପୋଲିସର ଗୁଳିମାଡରେ ଆହତ ଗୋରୁ ମାଫିଆକୁ ହସ୍ପିଟାଲରେ ଭର୍ତ୍ତି କରାଯାଇଛି ।

ସୂଚନା ଅନୁସାରେ, ହରିଚନ୍ଦନପୁର ଥାନା କୁଲାଢାଙ୍କୁଣି ଅଞ୍ଚଳରେ 3ଟି ପିକଅପ୍ ଭ୍ୟାନ ଗୋରୁ ଚାଲାଣ ହେଉଥିବା ପୋଲିସକୁ ଖବର ମିଳିଥିଲା । ଏହାପରେ ପୋଲିସ ଟିମ୍ ପହଞ୍ଚି ଗୋଚାଲାଣ ଗାଡିକୁ ଅଟକାଇବାକୁ ଚେଷ୍ଟା କରିଥିଲା । ଏହି ସମୟରେ ପୋଲିସ ଉପରକୁ ଗୁଳି ଚଳାଇଥିଲେ ଗୋରୁ ଚାଲାଣକାରୀ । ଏହାର କଡ଼ା ଜବାବ ଦେଇଥିଲା ପୋଲିସ । ପୋଲିସ ଗୋରୁ ଚାଲାଣକାରୀଙ୍କ ଉପରକୁ ଗୁଳି ଚଳାଇଥିଲା। । ଏଥିରେ ଜଣେ ଗୋରୁ ମାଫିଆ ଗୋଡରେ ଦୁଇଟି ଗୁଳି ବାଜିଥିଲା। ଗୁରୁତର ଅବସ୍ଥାରେ ପୋଲିସ ତାକୁ ଆଣି ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଛି । ଯାହା ସୂଚନା ମିଳିଛି, ଆହତ ଗୋଚାଲାଣକାରୀ ଜଣଙ୍କ ସାନ୍ତରାପୁର ଅଞ୍ଚଳର । ତାଙ୍କର ପରିଚୟ ମିଳି ପାରିନାହିଁ। ପୋଲିସ ଏହାର ତଦନ୍ତ ଆରମ୍ଭ କରିଥିବା ବେଳେ ଏନେଇ କୌଣସି ଅଧିକାରୀଙ୍କ ପ୍ରତିକ୍ରିୟା ମିଳି ପାରିନାହିଁ ।