ଆଜି ନୌସେନା ଦିବସ: ସାମିଲ ହେବେ ରାଷ୍ଟ୍ରପତି

ଆଜି ବିଶ୍ବ ଦେଖିବ ଭାରତୀୟ ନୌସେନାର ପରାକାଷ୍ଠା । ପୁରୀ ବ୍ଲୁ-ଫ୍ଲାଗ ବିଚରେ ପାଳନ ହେବ ନୌସେନା ଦିବସ-୨୦୨୪। ଏହି କାର୍ଯ୍ୟକ୍ରମରେ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ସହ ଏକାଧିକ କେନ୍ଦ୍ର ଏବଂ ରାଜ୍ୟ ମନ୍ତ୍ରୀଙ୍କ ସହ ବହୁ ମାନ୍ୟଗଣ ବ୍ୟକ୍ତିବିଶେଷ ମଧ୍ୟ ଯୋଗଦେବା କାର୍ଯ୍ୟକ୍ରମ ରହିଛି । ଜଗନ୍ନାଥ ଧାମରେ ନୌବୀରଙ୍କ ପରାକ୍ରମ ଦେଖିବାକୁ ଅପେକ୍ଷାରେ କୋଟି କୋଟି ଭାରତୀୟ । ନୌସେନା ପକ୍ଷରୁ ସୋମବାର ବ୍ଲୁ-ଫ୍ଲାଗ ବିଚରେ ଫୁଲ୍ ଡ୍ରେସ୍ ରିହରସଲ୍‌ ଅନୁଷ୍ଠିତ ହୋଇଥିଲା । ତେବେ ଆଜି (ବୁଧବାର) ପ୍ରଦର୍ଶିତ ହେବ ଅସଲ ପରାକ୍ରମ । ଏନେଇ ପୁରୀରେ କଡା ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି । ତିନି ସେନା ବାହିନୀର ସର୍ବୋଚ୍ଚ କମାଣ୍ଡର ଭାବେ ରାଷ୍ଟ୍ରପତି ଦ୍ରୌପଦୀ ମୁର୍ମୁ ଏହି କାର୍ଯ୍ୟକ୍ରମରେ ମୁଖ୍ୟଅତିଥି ଭାବେ ଯୋଗ ଦେଉଥିବାରୁ ପୁରୀରେ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଛି ।

ରାଷ୍ଟ୍ରପତି ଆଜି ଅପରାହ୍ନ ୩ଟା ୫୫ରେ ବ୍ଲୁ-ଫ୍ଲାଗ ବିଚରେ ପହଞ୍ଚିବା ପରେ ୪ଟା ୭ରେ ପ୍ରଥମେ ଜାତୀୟ ସଂଗୀତ ଗାନ କରାଯିବ । ଅପରାହ୍ନ ୪ଟାରୁ ଆରମ୍ଭ ହେବ ନୌସେନାର ଭବ୍ୟ ସମାରୋହ । ନୌସେନାର ପରାକ୍ରମୀ ଯବାନମାନେ ବିଭିନ୍ନ ଦୁଃସାହସିକ ଯୁଦ୍ଧକୌଶଳ ପ୍ରଦର୍ଶନ କରିବେ । ସନ୍ଧ୍ୟା ୫ଟା ୨୦ ପର୍ଯ୍ୟନ୍ତ ପର୍ଯ୍ୟନ୍ତ ନୌସେନାର ମେରାଇନ୍ କମାଣ୍ଡୋ ତଥା ‘ମାର୍କୋସ’ ବିଭିନ୍ନ ଯୁଦ୍ଧ ରଣକୌଶଳ ପ୍ରଦର୍ଶନ କରିବେ । ରାଷ୍ଟ୍ରପତି ପ୍ରସ୍ଥାନ କରିବା ପରେ ଲେଜର ସୋ’ ସହିତ ଆକର୍ଷଣୀୟ ଡ୍ରୋନ୍ ସୋ’ ପ୍ରଦର୍ଶିତ ହେବ । ସନ୍ଧ୍ୟା ୬ଟା ୧୫ ପର୍ଯ୍ୟନ୍ତ ଏହି ସ୍ଵତନ୍ତ୍ର କାର୍ଯ୍ୟକ୍ରମ ଅନୁଷ୍ଠିତ ହେବ । ଉଭୟ ସମୁଦ୍ର ଓ ଆକାଶରେ ୨୦ରୁ ଊର୍ଦ୍ଧ୍ବ ଯୁଦ୍ଧ ମୁକାବିଲା କଳା-କୌଶଳ ପ୍ରଦର୍ଶନ କରିବେ । ନାଭାଲ ମ୍ୟୁଜିକ୍ ବ୍ୟାଣ୍ଡ୍ ଏବଂ ମଞ୍ଚ ଉପରେ ନୌସେନାଙ୍କ ଚିତ୍ତାକର୍ଷକ ଡ୍ରିଲ୍ ଦର୍ଶକଙ୍କୁ ନିଆରା ଅନୁଭୂତି ପ୍ରଦାନ କରିବ । ବୁଡ଼ାଜାହାଜ, ଯୁଦ୍ଧ ଜାହାଜ, ଟ୍ୟାଙ୍କ୍, ପାରା ଜମ୍ପର୍ସଙ୍କ ପ୍ରଦର୍ଶନ ମଧ୍ୟ ଦେଖିବାର ସୁଯୋଗ ମିଳିବ ।

ଏନେଇ ‘ଆଇଏନ୍‌ଏସ-ଚିଲିକା’ର ମୁଖ୍ୟ କମାଣ୍ଡିଂ ଅଧିକାରୀ ଦୀପକ ଅନିଲ କହିଛନ୍ତି,”୧୯୭୧ ମସିହା ଯୁଦ୍ଧରେ ଭାରତୀୟ ନୌସେନା ପାକିସ୍ତାନର ବନ୍ଦର ସହର କରାଚି ଉପରେ ପ୍ରଚଣ୍ଡ ଆକ୍ରମଣ କରି ଧ୍ବଂସବିଧ୍ୱଂସ୍ତ କରିଦେଇଥିଲା । ଏହି ସ୍ମୃତିରେ ପ୍ରତିବର୍ଷ ଡିସେମ୍ବର ୪ ତାରିଖରେ ନୌସେନା ଦିବସ ପାଳନ କରାଯାଉଛି । ଏହା ଆମ ନୌସେନାର ଦକ୍ଷତାର ପରିଚୟ ।” ସେହିପରି ପୁରୀ ଜିଲ୍ଲାପାଳ ସିଦ୍ଧାର୍ଥ ଶଙ୍କର ସ୍ବାଇଁ କହିଛନ୍ତି,” ଓଡ଼ିଶାରେ ଏବଂ ପୁରୀ ସମୁଦ୍ର କୂଳରେ ନୌସେନାର ଏହି ଭବ୍ୟ କାର୍ଯ୍ୟକ୍ରମ ଆୟୋଜନ କରାଯିବା ଆମ ପାଇଁ ଗର୍ବର ବିଷୟ । ଲକ୍ଷାଧିକ ପର୍ଯ୍ୟଟକ ତଥା ଦର୍ଶକ ଏହି କାର୍ଯ୍ୟକ୍ରମକୁ ଦେଖିବେ । ଏଥିପାଇଁ ପୁରୀ ଜିଲ୍ଲା ପ୍ରଶାସନ ପକ୍ଷରୁ ସବୁ ପ୍ରକାର ବ୍ୟବସ୍ଥା ହୋଇଛି । ନୌସେନାର ଏହି ସ୍ଵତନ୍ତ୍ର କାର୍ଯ୍ୟକ୍ରମରେ 15 ଟି ଯୁଦ୍ଧ ଜାହାଜ ଓ 40ଟି ଏୟାରକ୍ରାଫ୍ଟ କାର୍ଯ୍ୟକ୍ରମରେ ସାମିଲ ହେବେ ।

ମୋ ଟିଭି ଓଡିଶା, ପୁରୀ