କର୍ମଚାରୀମାନଙ୍କର ଦକ୍ଷତା ବୃଦ୍ଧି ପରିପ୍ରେକ୍ଷୀରେ ଏକ ଅଭିଜ୍ଞତା ଆଦାନପ୍ରଦାନ ଓ ପରାମର୍ଶ କର୍ମଶାଳା

ଭୁବନେଶ୍ୱର ତା-୧୭.୦୧.୨୦୨୫

କର୍ମଚାରୀମାନଙ୍କର ଦକ୍ଷତା ବୃଦ୍ଧି ପରିପ୍ରେକ୍ଷୀରେ ଏକ ଅଭିଜ୍ଞତା ଆଦାନପ୍ରଦାନ ଓ ପରାମର୍ଶ କର୍ମଶାଳା  ମୁଖ୍ୟ ଶାସନ ସଚିବ ଶ୍ରୀ ମନୋଜ ଆହୁଜାଙ୍କ ଅଧ୍ୟକ୍ଷତାରେ ଲୋକସେବା ଭବନସ୍ଥିତ ସମ୍ମିଳନୀ କକ୍ଷରେ ବୁଧବାର ଅନୁଷ୍ଠିତ ହୋଇଯାଇଛି । କର୍ମଚାରୀଙ୍କ ଦକ୍ଷତା ବିକାଶରେ ଦୃତ ପରିବର୍ତ୍ତନ ପାଇଁ ମିଶନ କର୍ମଯୋଗୀ ତରଫରୁ ଲାର୍ଜ ସ୍କେଲ୍ ଇଣ୍ଟରଭେନସନ((ଏଲଏସଆଇ) ଭଳି ବଡ଼  ପଦକ୍ଷେପ  ନିଆଯାଇଛି । 

  ରାଜ୍ୟରେ ମିଶନ କର୍ମଯୋଗୀର କାର୍ଯ୍ୟକାରିତା କ୍ଷେତ୍ରରେ ସମନ୍ୱୟ ପାଇଁ ରାଜ୍ୟରେ ନୋଡାଲ ଏଜେନ୍ସି ଥିବା ଗୋପବନ୍ଧୁ ପ୍ରଶାସନ ଏକାଡେମୀ ତରଫରୁ ଭାରତ ସରକାରଙ୍କ ଦକ୍ଷତା ବିକାଶ ଆୟୋଗ(ସିବିସି) ସହଯୋଗରେ ଏହି କର୍ମଶାଳା  ଆୟୋଜନ  କରାଯାଇଥିଲା । 

ଗୋପବନ୍ଧୁ ପ୍ରଶାସନ ଏକାଡେମୀର ମହାନିର୍ଦ୍ଦେଶକ  ଜି. ମାଥି ଭାଥନନଙ୍କ ସଂଯୋଜନାରେ ଅନୁଷ୍ଠିତ ଏହି କର୍ମଶାଳାରେ ଓଡ଼ିଶା ପୁଲିସ ମହାନିର୍ଦ୍ଦେଶକ ଶ୍ରୀ ୱାଇବି ଖୁରାନିଆ ଏବଂ ଏଡିଜି,ପୁଲିସ୍ (ପ୍ରଶିକ୍ଷଣ)               ଶ୍ରୀ ସଞ୍ଜୀବ ପଣ୍ଡା, ବିଦ୍ୟାଳୟ ଓ ଗଣଶିକ୍ଷା ବିଭାଗ କମିଶନର  ତଥା ଶାସନ ସଚିବ ଶ୍ରୀମତୀ  ଶାଳିନୀ ପଣ୍ଡିତ ଏବଂ ଅନ୍ୟ  ବରିଷ୍ଠ ଅଧିକାରୀମାନେ ଯୋଗ ଦେଇଥିଲେ ।  

ସିବିସିର ସଦସ୍ୟ (ମାନବ ସମ୍ବଳ) ଡ. ଆର୍ ବାଲସୁବ୍ରମଣ୍ୟମ ତାଙ୍କ ଟିମ୍ ସହ  ଆଭାସୀ ମାଧ୍ୟମରେ ଏହି କର୍ମଶାଳାରେ ଯୋଗ ଦେଇଥିଲେ । ସେ ତାଙ୍କ ଅଭିଭାଷଣରେ ଦକ୍ଷତା ବିକାଶ କ୍ଷେତ୍ରରେ ଓଡ଼ିଶା ସରକାରଙ୍କ ସକ୍ରିୟ ପ୍ରୟାସକୁ ପ୍ରଶଂସା କରିବା ସହ ନାଗରିକ କୈନ୍ଦ୍ରିକ ଶାସନ ସୁନିଶ୍ଚିତ କରିବା ଏବଂ ବିକଶିତ ଭାରତ-୨୦୪୭ ଗଠନର ଅବଦାନ ସଂପର୍କରେ ଗୁରୁତ୍ୱାରୋପ କରିଥିଲେ ।

ସିବିସିର ଏକ ଅଂଶୀଦାର ଏଜେନ୍ସି ଇଲୁମିନ୍ ନଲେଜ୍ ରିସୋର୍ସେସ୍ ପ୍ରାଇଭେଟ୍ ଲିମିଟେଡ୍ ର  ପ୍ରତିନିଧିମାନେ ଏଲ୍ଏସ୍ଆଇ ପଦକ୍ଷେପଗୁଡ଼ିକୁ କାର୍ଯ୍ୟକାରୀ କରିବା ବିଷୟରେ ସୂଚନା ଦେଇଥିଲେ ।               ଡ. ଶ୍ରୀନିବାସ ଭେଙ୍କଟରାମ ଏବଂ ଶ୍ରୀ ବିରେନ ଆନନ୍ଦ ଭାରତୀୟ ରେଳବାଇ, ଭାରତୀୟ ଡାକ, ଦିଲ୍ଲୀ ପୋଲିସ ଏବଂ ହରିୟାଣା ପୋଲିସ ଭଳି ସଂସ୍ଥାରେ ଏହା କିପରି ସଫଳତାର ସହ କାର୍ଯ୍ୟକାରୀ କରାଯାଉଛି, ସେ ସମ୍ପର୍କରେ ଆଲୋକପାତ କରିଥିଲେ । ଉନ୍ନତ ସେବା ପ୍ରଦାନର ମୂଲ୍ୟାଙ୍କନ କରିବା ପାଇଁ ତୃତୀୟ ପକ୍ଷ ମୂଲ୍ୟାୟନ ଉପରେ ସେମାନେ ଗୁରୁତ୍ୱାରୋପ କରିଥିଲେ ।

‘କର୍ମଯୋଗୀ ପୁଲିସ’ ଓ ‘କର୍ମଯୋଗୀ ଶିକ୍ଷକ’ ଜରିଆରେ ରାଜ୍ୟରେ ପୁଲିସ କର୍ମଚାରୀ ଓ ଶିକ୍ଷକମାନଙ୍କ ପାଇଁ ଆବଶ୍ୟକତା ଅନୁଯାୟୀ ଅଫ ଲାଇନ୍ ଓ ଅନ ଲାଇନ୍ ପାଠ୍ୟକ୍ରମ ପ୍ରସ୍ତୁତ କରି ଦକ୍ଷତା ବିକାଶ ଆୟୋଗ ଓଡ଼ିଶା ସରକାରଙ୍କୁ ନିରନ୍ତର ସହଯୋଗ ପ୍ରଦାନ କରିବା ସଂପର୍କରେ ବୈଠକରେ ବିସ୍ତୃତ ଆଲୋଚନା କରାଯାଇଥିଲା ।