ଜନ୍ମ ମାଟିରେ ମୁଖ୍ୟମନ୍ତ୍ରୀ ।

ମୋ ଟିଭି ଓଡିଶା / କେନ୍ଦୁଝର :

ଜନ୍ମ ମାଟିରେ ମୁଖ୍ୟମନ୍ତ୍ରୀ । ମୁଖ୍ୟମନ୍ତ୍ରୀ ଭାବେ ଦାୟିତ୍ୱ ନେବା ପରେ ଜନ୍ମ ମାଟିରେ ପାଦ ଦେଇ ବିପୁଳ ସମ୍ବର୍ଦ୍ଧନା ଗ୍ରହଣ କରିଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ରବିବାରଠୁ ଦୁଇ ଦିନିଆ କେନ୍ଦୁଝର ଜିଲ୍ଲାଗସ୍ତରେ ଆସି ମୁଖ୍ୟମନ୍ତ୍ରୀ ଘଟଗାଁ ମା’ ତାରିଣୀଙ୍କୁ ଦର୍ଶନ କରିବା ସହିତ ଅପରାହ୍ନରେ ନିଜ ନିର୍ବାଚନ ମଣ୍ଡଳୀ କେନ୍ଦୁଝରକୁ ଆସି ରାଷ୍ଟ୍ର ଦେବତା ଶ୍ରୀବଳଦେବଜୀଉଙ୍କ ମନ୍ଦିରକୁ ଯାଇ ଦର୍ଶନ କରିଥିଲେ । ଏହା ପରେ କେନ୍ଦୁଝର ସହରରେ ଏକ ରୋଡ଼ ସୋ କରିବା ସହ ଷ୍ଟାଡିୟମଠାରେ ଏକ ସମ୍ବର୍ଦ୍ଧନା ଓ ସାଧାରଣ ସଭାରେ ଯୋଗ ଦେଇଥିଲେ । ଏହି ଅବସରରେ ସେ ଆଦିବାସୀଙ୍କ ସ୍ବାର୍ଥ ସମ୍ପର୍କରେ ଆଲୋଚନା କରିବା ସହ ସେମାନଙ୍କୁ ଉଚିତ ସମ୍ମାନ ପ୍ରଦାନ କରାଯିବ ବୋଲି କହିଥିଲେ ।

ନିଜ ଅଭିଭାଷଣରେ ନୂଆ ଓଡିଶା ଗଠନ ପାଇଁ ଗୁଣ୍ଡିଚି ମୂଷାର ଭୂମିକା ନେବାକୁ ସେ ଆହ୍ୱାନ ଦେଇଥିଲେ । ପୂର୍ବ ସରକାରର ସମସ୍ତ ଦୁର୍ନୀତିର ତଦନ୍ତ ହେବ ବୋଲି ସେ କହିବା ସହିତ ଓଡ଼ିଆ ଅସ୍ମିତାକୁ ପୁନର୍ଜୀବିତ କରିବା ସହିତ ସାଂସ୍କୃତିକ ଅଭ୍ୟୁଥାନ କରିବାକୁ ସେ ନିବେଦନ କରିଥିଲେ । ଧରଣୀଧରଙ୍କ ମାଟିରେ ସ୍ୱାଭିମାନକୁ ନେଇ ଆଗାମୀ ପଦକ୍ଷେପ ନେବାକୁ ସେ ମତ ଦେଇଥିଲେ । କେନ୍ଦୁଝରର ସମସ୍ତ ଭାଇଭଉଣୀଙ୍କୁ ସେ ବିଶେଷ ଭାବେ ଧନ୍ୟବାଦ ଦେବା ସହ କେନ୍ଦୁଝର ଜିଲ୍ଲାର ବିକାଶ ପାଇଁ ଅର୍ଥର ଅଭାବ ନାହିଁ ବୋଲି କହିଥିଲେ । ସେହିପରି ସୁନାର କେନ୍ଦୁଝର ଗଢି ତୋଳିବାକୁ ସେ ସମସ୍ତଙ୍କର ସହଯୋଗ କାମନା କରିଥିଲେ ।

ଭାରତୀୟ ଜନତା ପାର୍ଟି ଲୋକଙ୍କ ସହ ମିଶି ନିର୍ବାଚନ ଇସ୍ତାହାର ଦେଇଥିଲା ସେହି ନିର୍ବାଚନ ଇସ୍ତାହାର ପାଳନ କରାଯିବ ବୋଲି କହିଥିଲେ । ବିଜେଡି ଗଣତନ୍ତ୍ରକୁ ଦଳି ଚକଟି ଲୁଣ୍ଠିତ କରିବା ସହ ମହାପ୍ରଭୁଙ୍କ ମଧ୍ୟ ଅପମାନିତ କରିଥିଲେ । ଏହି ସରକାର ଲୋକଙ୍କ ସରକାର ଓ ୫ ବର୍ଷରେ ୫୦ବର୍ଷର ବିକାଶ ହେବ ବୋଲି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ପ୍ରକାଶ କରିଥିଲେ । ମହିଳାମାନଙ୍କୁ ୫୦ହଜାର ଟଙ୍କାର ଭାଉଚର, ଚାଷୀଙ୍କୁ ଧାନର ସର୍ବନିମ୍ନ ସହାୟକ ମୂଲ୍ୟ ପ୍ରଦାନ କରାଯିବା ସହିତ କୃଷକଙ୍କ ଆର୍ଥିକ ମାନଦଣ୍ଡ ବୃଦ୍ଧି କରାଯିବା ସହ ଆଦିବାସୀଙ୍କୁ ମିଳିବ ଉଚିତ୍ ସମ୍ମାନ ବୋଲି କହିଥିଲେ ।