ଗ୍ରାହକଙ୍କ ପାଇଁ ଖୁସି ଖବର । କମିପାରେ ଆଳୁ ଦର ।

ରାଜ୍ୟରେ କିଛି ଦିନ ହେବ ଆଳୁ ଦର ଆକାଶ ଛୁଆଁ ରହିଥିବାବେଳେ ବର୍ତ୍ତମାନ ଏଥିରେ ଲଗାମ ଲାଗିଛି । ବଜାରରେ ଆଳୁ ଦର ୩୦ ଟଙ୍କା ରହିଥିବାବେଳେ ଆଗକୁ ଏହି ଦର ଆହୁରି କମିବ ବୋଲି ଖାଦ୍ୟ ଯୋଗାଣ ମନ୍ତ୍ରୀ କୃଷ୍ଣଚନ୍ଦ୍ର ପାତ୍ର ପ୍ରତିକ୍ରିୟା ରଖିଛନ୍ତି । ଆଳୁ ଦର କମିବାକୁଥିବାବେଳେ ଯେଉଁମାନେ କଳାବଜାରୀ କରିବେ ତାଙ୍କ ଉପରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ଯୋଗାଣ ମନ୍ତ୍ରୀ ଚେତାବନୀ ଦେଇଛନ୍ତି । ସେପଟେ ପିଆଜ ଦର ବୃଦ୍ଧି ମଧ୍ୟ ଚିନ୍ତା ବଢାଇଛି ।

ମନ୍ତ୍ରୀ କୃଷ୍ଣଚନ୍ଦ୍ର ପାତ୍ର କହିଛନ୍ତି, ” ଏବେ ବଜାରରେ ଆଳୁ ଦର 30 ଟଙ୍କା ଅଛି ଆହୁରି କମିବ। କଳାବଜାରୀ ପାଇଁ ଏନଫୋର୍ସମେଣ୍ଟ ଟିମ୍ କାମ କରୁଛନ୍ତି । ଯେଉଁମାନେ କଳାବଜାରୀ କରିବେ ତାଙ୍କ ଉପରେ କାର୍ଯ୍ୟାନୁଷ୍ଠାନ ନିଆଯିବ । ଗ୍ରାହକମାନଙ୍କୁ ସୁଲଭ ମୂଲ୍ୟରେ ଯୋଗାଣ ବିଭାଗ ତରଫରୁ ଆଳୁ ଯୋଗାଇ ଦିଆଯାଇଛି ।” ଆଳୁ କେଉଁଠାରୁ ଆସୁଛି ପ୍ରଶ୍ନର ଉତ୍ତର ରଖି ଯୋଗାଣ ମନ୍ତ୍ରୀ କହିଛନ୍ତି, ” ଆଳୁ କାହାଠୁ ଆଣିବୁ ସେମିତି କିଛି ନାହିଁ ।ଆମର କାହା ସହ ଶତ୍ରୁତା ନାହିଁ । ଯିଏ ଆମକୁ ଭଲ ରେଟରେ ଆଳୁ ଯୋଗାଇଲା ଆମେ ସେମାନଙ୍କଠାରୁ ଆଣିବୁ । ବର୍ତ୍ତମାନ ଆଳୁ ପଶ୍ଚିମବଙ୍ଗ ଓ ଉତ୍ତରପ୍ରଦେଶରୁ ଆସୁଛି ।”

ଅନ୍ୟପଟେ ପିଆଜ ଦରବୃଦ୍ଧିକୁ ସ୍ୱୀକାର କରିଛନ୍ତି ଯୋଗାଣ ମନ୍ତ୍ରୀ କୃଷ୍ଣଚନ୍ଦ୍ର ପାତ୍ର । ସେ କହିଛନ୍ତି,” ରାଜ୍ୟରେ ପିଆଜ ଦର ବୃଦ୍ଧି ହୋଇଛି । ତା’ ପାଇଁ ଆମେ ବ୍ୟବସ୍ଥା କରୁଛୁ । ବାହାରୁ ପିଆଜ ଆଣି ଲୋକମାନଙ୍କୁ ଦେବୁ । ନାସିକରୁ ପିଆଜ ଆସିବ । ଆମ ରାଜ୍ଯରେ ପର୍ଯ୍ୟାପ୍ତ ପରିମାଣରେ ଆଳୁ ଏବଂ ପିଆଜ ହୋଇପାରିବ । ପୂର୍ବ ସରକାର 24 ବର୍ଷରେ କିଛି ଏହା ଉପରେ କରିପାରିଲେ ନାହିଁ। ଆମ ସରକାରରେ କୃଷି ମନ୍ତ୍ରୀ ଦାୟିତ୍ବ ନେଇଛନ୍ତି । ସେ ଦିଗରେ ସେ କାମ କରୁଛନ୍ତି ।” ସେହିପରି ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ବିଭାଗ ପକ୍ଷରୁ ସାଧାରଣ ବଣ୍ଟନ ମାଧ୍ୟମରେ ସର୍ବସାଧାରଣମାନଙ୍କୁ କିଲୋଗ୍ରାମ ପିଛା ୩୦ ଟଙ୍କାରେ ଆଳୁ ବିକ୍ରୟ ଆରମ୍ଭ ହୋଇଛି ।

ମୋ ଟିଭି ଓଡିଶା, ଭୁବନେଶ୍ୱର