ପ୍ରବାସୀ ଭାରତୀୟଙ୍କୁ କଟକରେ ଭବ୍ୟ ସ୍ବାଗତ

ପ୍ରବାସୀ ଭାରତୀୟ ଦିବସ ଉତ୍ସବର ପ୍ରଥମ ଦିନରେ କଟକକୁ ୫୭ ଜଣ ପ୍ରବାସୀ ଭାରତୀୟମାନେ ବୁଲି ଆସିଥିଲେ । କଟକର ଅନେକ ସ୍ଥାନ ଯଥା ନେତାଜୀ ଜନ୍ମ ସଂଗ୍ରହାଳୟ, ସିଲଭର ସିଟି ବୋଟିଂ କ୍ଲବ, ଚଣ୍ଡୀ ମନ୍ଦିର, ନୌବାଣିଜ୍ୟ ସଂଗ୍ରହାଳୟ, ଧବଳେଶ୍ବର ମନ୍ଦିର ଭଳି ଅନେକ ସ୍ଥାନ ବୁଲିଛନ୍ତି । ଆମେରିକା, ଦୁବାଇ ଭଳି ଅନେକ ଦେଶରେ ରହୁଥିବା ଭାରତୀୟ ପ୍ରବାସୀମାନଙ୍କୁ କଟକ ବେଶ ପସନ୍ଦ ଆସିଥିଲା। ସେମାନେ ପ୍ରଥମେ ନେତାଜୀ ଜନ୍ମ ସଂଗ୍ରହାଳୟ ଯାଇଥିଲେ ଏବଂ ପରେ କଟକର ଅନେକ ସ୍ଥାନ ବୁଲିଥିଲେ । ପ୍ରବାସୀ ଭାରତୀୟଙ୍କୁ ସହଯୋଗ ଏବଂ ସ୍ୱାଗତ କରିବା ପାଇଁ ସହରରେ ବିଭିନ୍ନ ପ୍ରକାର ବନ୍ଦୋବସ୍ତ ହୋଇଛି । ବିଶେଷ କରି ସିଲଭର ସିଟି ବୋଟିଂ କ୍ଲବ ପରିସରରେ ବ୍ୟାପକ ବ୍ୟବସ୍ଥା ହୋଇଛି । ଗୋଟିଏ ସ୍ଥାନରେ କଟକ ଜିଲ୍ଲାର ସମସ୍ତ ଐତିହ୍ୟକୁ ପ୍ରଦର୍ଶିତ କରାଯାଇଛି । ସେ ମାଣିଆ ବନ୍ଧର ପାଟ ଶାଢ଼ୀ ହେଉ ଅବା କଟକର ସୁକ୍ଷ୍ମ ତାରାକସି କାର୍ଯ୍ୟ, ବଡମ୍ବାର କାଠ ଓ ଡୋକ୍ରା ହେଉ ଅବା କଟକ ପ୍ରସିଦ୍ଧ ଦହିବରା । ସେସବୁକୁ ଏହି ସ୍ଥାନମାନଙ୍କରେ ପ୍ରଦର୍ଶିତ କରାଯାଇଛି । ଫଳରେ ଯେଉଁ ପ୍ରବାସୀ ଭାରତୀୟମାନେ ଆସୁଛନ୍ତି ସେମାନେ କଟକ ସମ୍ପର୍କରେ ଅନେକ ତଥ୍ୟ ଜାଣି ସହ ଭରପୁର ମଜା ନେଇପାରୁଛନ୍ତି।

ଦହିବରା ପାଇଁ କଟକ ବେଶ ପ୍ରସିଦ୍ଧି ହାସଲ କରିଛି । ପ୍ରବାସୀ ଭାରତୀୟମାନଙ୍କ ପାଇଁ ଦହିବରା ର ଏକ ସ୍ୱତନ୍ତ୍ର ଷ୍ଟଲ କରାଯାଇଛି । ପ୍ରବାସୀ ଭାରତୀୟମାନେ ଦହିବରା ଖାଇବାର ମଜା ମଧ୍ୟ ନେଇଛନ୍ତି । ଅନେକ ପ୍ରବାସୀ ଏହି ଦହିବରା ଖାଇବାକୁ ପସନ୍ଦ କରିଥିଲେ । ଷ୍ଟଲରେ ଲାଗିଥିଲା ଭିଡ଼ । କଟକ ମାଣିଆବନ୍ଧର ତନ୍ତ ବୁଣା ଶାଢ଼ୀ ମଧ୍ୟ ପ୍ରସିଦ୍ଧି ହାସଲ କରିଛି । ତନ୍ତରେ ପ୍ରସ୍ତୁତ ପାଟ ଶାଢ଼ୀ, ଡ୍ରେସ , କପଡାର ଅନେକ ଆଇଟମ ଏହି ଷ୍ଟଲରେ ସଜାଇ ରଖାଯାଇଛି ବ୍ୟବସାୟୀ ସୁରେନ୍ଦ୍ର ଦତ୍ତ । ବିଭିନ୍ନ ଡିଜାଇନର କଟନ ଶାଢ଼ୀକୁ ସେ ଏହି ଷ୍ଟଲରେ ରଖିଛନ୍ତି । ଏହି ଷ୍ଟଲରେ ମଧ୍ୟ ତନ୍ତରେ ସେ ଲୁଗା ବୁଣୁଥିଲେ, ଯାହାକୁ ପ୍ରବାସୀମାନେ ଦେଖି ଫଟୋ ଉଠାଇବା ସହ ଅନେକ ଶାଢ଼ୀ ମଧ୍ୟ କିଣି ନେଇଥିଲେ।

ତାରକସି କାର୍ଯ୍ୟ ପାଇଁ କଟକ ବେଶ ପ୍ରସିଦ୍ଧ । ଅଳଙ୍କାରରେ ତାରକସି କାମର ନିଖୁଣ କାରିଗରୀ ସମସ୍ତଙ୍କୁ ବେଶ ଆକର୍ଷିତ ହୋଇଥାଏ । କଟକ ଦଶହରାରେ ମେଢ଼ ଗୁଡିକରେ ଯେଉଁ ସବୁ ଚାନ୍ଦି କାମ ହୁଏ ତାହା କେବଳ କଟକ ତାରକସି କାରିଗରମାନଙ୍କ ଦ୍ୱାରା ହୋଇଥାଏ । ଯାହାକୁ ଦେଖିବାକୁ କେବଳ ଓଡିଶାର ଲୋକ କାହିଁକି ବରଂ ଦେଶର ଅନେକ ସ୍ଥାନରୁ ଦର୍ଶକଙ୍କ ସୁଅ ଛୁଟି ଥାଏ । ଏହି ସୁକ୍ଷ୍ମ କାରିଗରୀ କାମକୁ ପ୍ରଦର୍ଶନ କରିବାକୁ ଯାଇ ପ୍ରବାସୀ ଭାରତୀୟମାନଙ୍କ ପାଇଁ ସ୍ୱତନ୍ତ୍ର ଷ୍ଟଲ ରଖାଯାଇଛି ।  ପ୍ରବାସୀ ଭାରତୀୟମାନେ ମଧ୍ୟ ଏହାକୁ ନେଇ ବେଶ ପ୍ରଶଂସା କରୁଛନ୍ତି ।”

ମୋ ଟିଭି ଓଡିଶା, କଟକ