ଏସ୍‌ଏଚ୍‌ଜି ଗ୍ରୁପ୍ ଦ୍ୱାରା ଧାନମଣ୍ଡିରେ ଅନିୟମିତତା ପ୍ରସଙ୍ଗ,ବିଭାଗୀୟ ଅଧିକାରୀଙ୍କ ଅଭିଯୋଗର ତଦନ୍ତ

ମୋ ଟିଭି ଓଡିଶା / ଆଗରପଡ଼ା : ୦୭/୦୮

ଭଦ୍ରକ ଜିଲ୍ଲା ବନ୍ତ ବ୍ଲକ ଅଧିନସ୍ଥ ଚାରିଗାଁ ଗ୍ରାମ ପଂଚାୟତର ଜନପ୍ରତିନିଧି ଓ ଚାଷୀବୃନ୍ଦ ଧାନ କ୍ରୟ କରିବା ନିମନ୍ତେ ଆଜକୁ ୪ବର୍ଷ ଧରି ଧାନମଣ୍ଡି ଦାଇତ୍ୱରେ ଥିବା ଚକ୍ରାପାଢୀ ସ୍ଥିତ ମା’ ବୁଢୀଜାଗୁଳାଇ ଏସ୍‌ଏଚ୍‌ଜି ଗ୍ରୁପ୍ ଦ୍ୱାରା ହୋଇଥିବା ବିଭିନ୍ନ ଅନିୟମିତତାକୁ ନେଇ ଗତ ଜୁଲାଇ ମାସ ୧ ତାରିଖରେ ଜିଲ୍ଲାପାଳଙ୍କ ଅଭିଯୋଗ ପ୍ରକୋଷ୍ଠରେ ଲିଖିତ ଅଭିଯୋଗ କରିଥିଲେ । ଚାଷୀଭାଇମାନେ ଧାନବିକ୍ରୀ ବାବଦରେ ଅନ୍‌ଲାଇନ୍ ପାଇଁ ଆବଶ୍ୟକୀୟ କାଗଜପତ୍ର ମଣ୍ଡିରେ ଦେଇଥିଲେ ସୁଦ୍ଧା ତାହାକୁ ସୂଚାରୁରୂପେ ନତୁଲାଇ ତାଙ୍କୁ(ଏସ୍‌ଏଚ୍‌ଜି ଗ୍ରୁପ୍ )ସୁହାଇବା ପରି ଚାଷୀଙ୍କୁ ପ୍ରୋତ୍ସାହିତ କରିବା । ବିଭିନ୍ନ ଆଳଦେଖାଇ ଚାଷୀଙ୍କୁ ହଇରାଣ ହରକତ କରିବା । ଯେଉଁ ମାନଙ୍କ ଚାଷଜମି ନଥାଏ ସେମାନଙ୍କ ନାମରେ ଅନ୍ୟମାନଙ୍କ ଜାଗଜପତ୍ରକୁ ନେଇ ଭାଗଚାଷୀ ଦର୍ଶାଇ ଅନ୍‌ଲାଇନ୍ କରିବା । କ୍ଷୁଦ୍ରଚାଷୀ ଧାନମଣ୍ଡିରେ ଅନ୍‌ଲାଇନ୍ କରିଥିଲେ ସୁଦ୍ଧା ଧାନବିକ୍ରିରୁ ବଂଚିତ କରାଇବା । ଧାନମଣ୍ଡିରେ କରାଯାଇଥିବା କମିଟିରେ ମଧ୍ୟ ପାତରଅନ୍ତର କରିବା । ଅନ୍ୟ ପଂଚାୟତବାସୀଙ୍କୁ ଧାନମଣ୍ଡିରେ ଧାନ ବିକ୍ରୀପାଇଁ ସୁଯୋଗ ଦେବା ହେତୁ ନିଜ ପଂଚାୟତବାସୀ ଧାନ ପକାଇବାରେ ଅସୁବିଧାର ସମ୍ମୁଖିନ ହେବା । ଏହିସବୁ କାରଣରୁ ଚାଷୀ ବାଧ୍ୟହୋଇ ଦଲାଲକୁ ଧାନ ବିକ୍ରୀକରି ଉଚିତ୍ ମୂଲ୍ୟ ପାଇବାରୁ ବଂଚିତ ହେବା ଆଦି ପ୍ରସଙ୍କକୁ ନେଇ ଅଭିଯୋଗ ହୋଇଥିଲା । ଜନପ୍ରତିନିଧି ଓ ଚାଷୀବୃନ୍ଦଙ୍କ ଅଭିଯୋଗକୁ ବିଚାରକୁ ନେଇ ଜିଲ୍ଲାପାଳ ଏହାର ନିରପେକ୍ଷ ତଦନ୍ତ ପାଇଁ ଜିଲ୍ଲା ମୁଖ୍ୟ ଯୋଗାଣ ଅଧିକାରୀଙ୍କୁ ନିର୍ଦ୍ଦେଶ ଦେଇଥିଲେ ।

ଜିଲ୍ଲାପାଳଙ୍କ ନିର୍ଦ୍ଦେଶାନୁସାରେ ଗତ ମଙ୍ଗଳବାର ବନ୍ତ ବ୍ଲକ ସିଡ଼ିପିଓ ରିତାରାଣୀ ମାଝୀ,ଯୋଗାଣ ଅଧିକାରୀ,ଓଏଲଏମ,ବିପିଏମ୍ ଏବଂ ସର୍କଲ ପରିଦର୍ଶିକା ଅଭିଯୋଗର ତଦନ୍ତ କରିଥିଲେ । ତଦନ୍ତ ସମୟରେ ସ୍ଥାନୀୟ ସରପଂଚଙ୍କ ସମେତ ଅଭିଯୋଗକାରୀ ଉପସ୍ଥିତ ଥିବାବେଳେ ମା’ବୁଢୀଜାଗୁଳାଇ ଏସ୍‌ଏଚ୍‌ଜି ଗ୍ରୁପ୍‌ର ସଂପାଦକ ସ୍ୱପ୍ନା ସରୀତା ପଣ୍ଡା ଓ ସଭାପତି ମାଳତୀ ସାହୁ ମଧ୍ୟ ଉପସ୍ଥିତ ଥିଲେ । ତଦନ୍ତ ସମୟରେ ୨୦୨୪-୨୫ବର୍ଷ ପାଇଁ କୌଣସି କମିଟି ଗଠନ କରାଯାଇନଥିବା ଏବଂ ୨୦୨୩ରେ ଗଠନ କରାଯାଇଥିବା କମିଟିରେ କମିଟି ସଦସ୍ୟଙ୍କ ଦସ୍ତଖତ ନକଲି ହୋଇଥିବା ଜଣାପଡ଼ିଥିଲା । ବିଭିନ୍ନ ଚାଷୀାଙ୍କ ଅଭିଯୋଗର ତଦନ୍ତ ମଧ୍ୟ କରାଯାଇଥିଲା । ତଦନ୍ତ ସମୟରେ ଚକ୍ରାପାଢୀ ଗ୍ରାମରେ ମଣ୍ଡି ଖୋଲିବା ପାଇଁ ଉପଯୁକ୍ତ ଜାଗା ଥିଲେ ସୁଦ୍ଧା କାହାର ପରାମର୍ଶ ବିନା ଓ ବିନା ରିଜୋଲ୍ୟୁସନରେ ତେଲନଟି ଗ୍ରାମରେ ଧାନମଣ୍ଡି ଖୋଲାହୋଇଥିବା ଜଣାପଡ଼ିଥିଲା । ଦଦନ୍ତ ସମୟରେ ମା’ବୁଢୀଜାଗୁଳାଇ ଏସ୍‌ଏଚ୍‌ଜି ଗ୍ରୁପ୍ ଦ୍ୱାରା ଏହିପରି ବିଭିନ୍ନ ଅନିୟମିତତା ହୋଇଥିବା ଜଣାପଡ଼ିଥିଲା ।