ବସରେ ଗଞ୍ଜେଇ ଚାଲାଣ: ପୁଲିସ ଖୋଜୁଥିଲା ହଜିଥିବା ପର୍ସ ମିଳିଲା ୫ କିଲୋ ଗଞ୍ଜେଇ

ସୋର :  ଏକ ଯାତ୍ରୀବାହୀ ବସରେ ଜଣେ ବ୍ୟକ୍ତିଙ୍କର ମନିପର୍ସ ହଜିବାରୁ ପୁଲିସ ବସରୁ ପର୍ସ ଖୋଜିବା ବେଳେ ଗାଡି ଡିକିରୁ ୫ କିଲୋ ଗଞ୍ଜେଇ ଜବତ କରିବା ସହିତ ଏଥିରେ ସମ୍ପୃକ୍ତ ଜଣେ ମହିଳାଙ୍କୁ ଅଟକ ରଖିଛି ଖନ୍ତାପଡ଼ା ପୁଲିସ। ସୂଚନା ଅନୁସାରେ ଆଜି ସନ୍ଧ୍ୟାରେ ଓଡ଼ି ୨୨ ସି ୦୭୩୩ ନାମକ ଡାଇନା ବସ ବାଲେଶ୍ୱରରୁ ଯାତ୍ରୀ ନେଇ ଭୁବନେଶ୍ୱର ଅଭିମୁଖେ ବାହାରିଥିଲା। ମାତ୍ର ଖନ୍ତାପଡା ନିକଟରେ ଜଣେ ବ୍ୟକ୍ତିଙ୍କର ପର୍ସ ହଜିଯିବାରୁ ସେ ଗାଡିକୁ ଅଟକ ରଖି ପୁଲିସକୁ ଖବର ଦେଇଥିଲେ। ପୁଲିସ ଘଟଣା ସ୍ଥଳରେ ପହଞ୍ଚି ବସରେ ପର୍ସ ଖୋଜୁଥିବା ବେଳେ ଗାଡିର ଡିକିରୁ ୫ କେଜି ଗଞ୍ଜେଇ ଜବତ କରିଥିଲା। ପରେ ଏଥିରେ ସମ୍ପୃକ୍ତ ଫୁଲବାଣୀ ଅଂଚଳର ଜଣେ ମହିଳାଙ୍କୁ ଅଟକ ରଖି ପଚରାଉଚରା ଆରମ୍ଭ କରିଛି ଖନ୍ତାପଡା ପୁଲିସ।ତେବେ ଗଞ୍ଜେଇ କେଉଁଠୁ କେଉଁଠିକୁ ଚାଲାଣ ହେଉଥିଲା ଏନେଇ କୌଣସି ସୂଚନା ମିଳିନଥିବା ବେଳେ ଯାତ୍ରୀମାନଙ୍କୁ ଅନ୍ୟ ବସରେ ପଠାଯାଇ ଉକ୍ତ ବସକୁ ଥନାରେ ଅଟକ ରଖାଯାଇଥିବା ଜଣାପଡିଛି। ତେବେ ଯାତ୍ରୀବାହୀ ବସରେ ଗଞ୍ଜେଇ ଚାଲାଣ ଏକ ନୂଆ ତରିକା ପଲଟିଥିବା ଜଣାପଡିଛି।