ପାଳନ ହେଲା ନୌସେନା ଦିବସ-2024

ଶ୍ରୀକ୍ଷେତ୍ରରୁ ବିଶ୍ବ ଦେଖିଲା ଭାରତୀୟ ଜଳଶକ୍ତିର ପରାକ୍ରମ । ପୁରୀ ଉପକୂଳରେ ସାମର୍ଥ୍ୟ ଦେଖାଇଲା ନୌସେନା । ଯୁଦ୍ଧ ଜାହାଜ ଓ ବିମାନର ଗର୍ଜନରେ ରୋମାଞ୍ଚିତ ହେଲେ ଅତିଥି ଓ ଦର୍ଶକ । ବେଳାଭୁମିରେ ସୃଷ୍ଟି ହେଲା ଯୁଦ୍ଧର ଭ୍ରମ । ପାଳିତ ହେଲା ଭାରତୀୟ ନୌସେନା ଦିବସ-2024 । କାର୍ଯ୍ୟକ୍ରମର ମୁଖ୍ୟ ଅତିଥି ଭାବେ ସାମିଲ ହେଲେ ରାଷ୍ଟ୍ରପତି ଦ୍ରୌପଦୀ ମୁର୍ମୁ । ରାଷ୍ଟ୍ରପତିଙ୍କ ସହ ରାଜ୍ୟପାଳ, ମୁଖ୍ୟମନ୍ତ୍ରୀ, ସମସ୍ତ ମନ୍ତ୍ରୀ, ଏକାଧିକ କେନ୍ଦ୍ରମନ୍ତ୍ରୀ ଓ ସମସ୍ତ ବିଧାୟକଙ୍କ ସମେତ ଦେଶବ୍ୟାପୀ ତମାମ ବିଶିଷ୍ଟ ବ୍ୟକ୍ତିବିଶେଷ କାର୍ଯ୍ୟକ୍ରମରେ ସାମିଲ ହୋଇ ଭାରତୀୟ ସାମୁଦ୍ରିକ ଶକ୍ତି ଓ ସାମର୍ଥର ସାକ୍ଷୀ ହୋଇଛନ୍ତି ।

ରାଷ୍ଟ୍ରପତି ଦ୍ରୌପଦୀ ମୁର୍ମୁ ବ୍ଲୁ-ଫ୍ଲାଗ ବିଚରେ ପହଞ୍ଚିବା ପରେ ନୌସେନା ପକ୍ଷରୁ ତାଙ୍କୁ ଗାର୍ଡ-ଅଫ-ଅନର ପ୍ରଦାନ କରାଯାଇଥିଲା । ନୌସେନା ମୁଖ୍ୟ ଆଡମିରାଲ ଦିନେଶ କୁମାର ତ୍ରିପାଠୀ ରାଷ୍ଟ୍ରପତିଙ୍କୁ ସ୍ବାଗତ କରି ଅଭିବାଦନ ସହ ମଞ୍ଚକୁ ପାଛୋଟି ନେଇଥିଲେ । ଏହା ପରେ ଜାତୀୟ ସଙ୍ଗୀତ ଗାନ ସହ ଆନୁଷ୍ଠାନିକ ଭାବେ ଆରମ୍ଭ ହୋଇଥିଲା ଅପରେସନାଲ ଡେମୋନଷ୍ଟ୍ରେସନ । ପ୍ରଥମେ ଫ୍ଲାଗ ଫରମେସନରେ ତିନୋଟି ହେଲିକପ୍ଟର ଉଡାଣ ଭରି ଉଡାଣ ଦକ୍ଷତା ପ୍ରଦର୍ଶନ ସ୍ବରୂପ ଯୁଦ୍ଧକଳା ପ୍ରଦର୍ଶନ ଆରମ୍ଭ କରିଥିଲେ ।

ପଛକୁ ପଛ ଏକାଧିକ ହେଲିକପ୍ଟର ଓ ଲଢୁଆ ବିମାନଗୁଡିକ ଭିନ୍ନ ଭିନ୍ନ ଫରମେସନରେ ଉଡାଣ ଭରି କଳାକୌଶଳ ପ୍ରଦର୍ଶନ କରିଥିଲେ । ଏହା ପରେ ଆରମ୍ଭ ହୋଇଥିଲା ସର୍ଚ୍ଚ ଓ ରେସ୍କ୍ୟୁ ଅପରେସନ । ନୌସେନାର ସ୍ପେଶାଲ ୟୁନିଟ ମରିନ କମାଣ୍ଡୋ ମାନେ ଆତଙ୍କବାଦୀଙ୍କ ଦ୍ବାରା ବନ୍ଧକ ଥିବା ଜଣେ ବ୍ୟକ୍ତିଙ୍କୁ ଉଦ୍ଧାର କରି ସମ୍ପୂର୍ଣ୍ଣ ସାମରିକ ଅପରେସନର ଭ୍ରମ ସୃଷ୍ଟି କରି ଦର୍ଶକଙ୍କୁ ବିମୋହିତ କରିଥିଲେ । ପରେ ଏକାଧିକ ଶ୍ରେଣୀର ଯୁଦ୍ଧପୋତ ଗୋଟିଏ ପରେ ଗୋଟିଏ ଅଭିବାଦନ ମଞ୍ଚ ସମ୍ମୁଖରେ ସମୁଦ୍ରରେ ଅତିକ୍ରମ କରିଥିଲେ । ଗୋଟିଏ ବୁଡ଼ା ଜାହାଜ ମଧ୍ୟ ଏହି ଅଭ୍ୟାସରେ ସାମିଲ ହୋଇଥିଲା । ସ୍କାଏ-କିଙ୍ଗ ହେଲିକପ୍ଟର କମାଣ୍ଡୋମାନେ ଏୟାର ଲିଫ୍ଟ ଅପରେସନ ପ୍ରଦର୍ଶିତ କରିଥିଲେ । ପରେ ଚେତକ, ରୋମିଓ, ହାଲ-ଧ୍ରୁବ, ଡ୍ରୋନିୟର, ମିଗ-29 ଓ ଆଣ୍ଟି-ସବମେରାଇନ ବିମାନ ପ୍ରମୁଖ ଉଡାଣ ଭରି ଗୋଲାବର୍ଷଣ କରିଥିଲେ ।

ମୋ ଟିଭି ଓଡିଶା, ପୁରୀ