ଆସିଲା ମାହାର୍ଘ୍ୟ ମୁହୂର୍ତ୍ତ: 5 ଦଶନ୍ଧି ପରେ ଖୋଲିଲା ରତ୍ନଭଣ୍ଡାର, ଭିତରେ ଯାଞ୍ଚ କରୁଛି 11ଜଣିଆ ଟିମ୍‌

ପୂରଣ ହେଲା କୋଟି କୋଟି ଜଗନ୍ନାଥପ୍ରେମୀଙ୍କ ଆକାଂକ୍ଷା । ଖୋଲିଲା ରତ୍ନଭଣ୍ଡାର । ଶ୍ରୀକ୍ଷେତ୍ରରେ ଅଦ୍ଭୁତପୂର୍ବ ପରିବେଶ । 11ଜଣିଆ ଟିମ ଜାରି ରଖିଛି ଯାଞ୍ଚ । ମିଳିବ କେତେ ଦୁର୍ଲ୍ଲଭ ଅଳଙ୍କାର, ରହିଛି ପୁରା ଦେଶର ନଜର ।

ମୋ ଟିଭି ଓଡିଶା / ପୁରୀ :

ଶେଷ ହେଲା ପ୍ରାୟ ଅର୍ଦ୍ଧଶତାବ୍ଦୀ ପ୍ରତୀକ୍ଷା । ଖୋଲିଲା ଚତୁର୍ଦ୍ଧାମୂର୍ତ୍ତିଙ୍କର ‘ରତ୍ନଭଣ୍ଡାର’ । ବହୁ ବିଚାରବିମର୍ଶ, ବୈଠକ, ପ୍ରସ୍ତୁତି ପରେ ସ୍ବତନ୍ତ୍ର ବ୍ୟବସ୍ଥା ମଧ୍ୟରେ ନିର୍ଦ୍ଧାରିତ ସମୟ ଅପରାହ୍ନ 1ଟା 28 ମିନିଟରେ ରତ୍ନଭଣ୍ଡାର ଖୋଲାଯାଇଛି । ‘ରତ୍ନଭଣ୍ଡାର ତଦାରଖ କମିଟି’ ମୁଖ୍ୟ ଜଷ୍ଟିସ୍‌ ବିଶ୍ବନାଥ ରଥଙ୍କ ନେତୃତ୍ବରେ 11ଜଣିଆ ଉଚ୍ଚସ୍ତରୀୟ ବିଶେଷଜ୍ଞ ଟିମ୍‌ ମନ୍ଦିର ମଧ୍ୟରେ ପ୍ରବେଶ କରି ରତ୍ନଭଣ୍ଡାର ଖୋଲିଛନ୍ତି । ପ୍ରଥମେ ବାହାର ଭଣ୍ଡାର ଖୋଲାଯାଇଛି । କଡା ସୁରକ୍ଷା ବଳୟ ମଧ୍ୟରେ ଶ୍ରୀମନ୍ଦିରର 4 ଦ୍ବାର ବନ୍ଦ ରଖାଯାଇଛି । ଏହାସହ 6ଟି କାଠ ନିର୍ମିତ ବିଶାଳ ସିନ୍ଧୁକ ମଧ୍ୟ ଶ୍ରୀମନ୍ଦିର ମଧ୍ୟକୁ ନିଆଯାଇଛି । ରତ୍ନଭଣ୍ଡାରରେ ଥିବା ଦୁର୍ମୂଲ୍ୟ ଅଳଙ୍କାରକୁ ପ୍ରଥମେ ଏହି କାଠ ସିନ୍ଧୁକରେ ରଖାଯିବ । ପରେ ଗଣତି ଓ ମଣତି ପ୍ରକ୍ରିୟା ହେବ ।

ଜଷ୍ଟିସ ବିଶ୍ୱନାଥ ରଥଙ୍କ ନେତୃତ୍ବରେ 11ଜଣିଆ ଉଚ୍ଚସ୍ତରୀୟ କମିଟି ଶ୍ରୀମନ୍ଦିର ମଧ୍ୟକୁ ପ୍ରବେଶ କରିଛନ୍ତି । ଏଥିରେ ଶ୍ରୀମନ୍ଦିର ମୁଖ୍ୟ ପ୍ରଶାସକ ଅରବିନ୍ଦ ପାଢୀ, ପୁରୀ ଜିଲ୍ଲାପାଳ, ଭାରତୀୟ ପ୍ରତ୍ନତାତ୍ତ୍ବିକ ସର୍ବେକ୍ଷଣ ସଂସ୍ଥା ‘ASI’ ଅଧିକ୍ଷକ, ଗଜପତି ମହାରାଜାଙ୍କ ପ୍ରତିନିଧି, ପାଟ୍ଟଯୋଶୀ ମହାପାତ୍ର, ଭଣ୍ଡାର ମେକାପ, ତଢ଼ାଉ କରଣ ଓ ଦେଉଳ କରଣଙ୍କ ବ୍ୟତୀତ ରତ୍ନଭଣ୍ଡାର ସବ-କମିଟିର ଜଣେ, ଉଚ୍ଚସ୍ତରୀୟ କମିଟିର ୨ ସଦସ୍ୟ ରହିଛନ୍ତି । ଏହାସହ ଏକ ଉଚ୍ଚପ୍ରଶିକ୍ଷିତ ସ୍ନେକ ହେଲ୍ପଲାଇନ ଟିମ ମଧ୍ୟ ଶ୍ରୀମନ୍ଦିର ମଧ୍ୟରେ ପ୍ରବେଶ କରିଛନ୍ତି । ଏହି ଟିମ ରତ୍ନଭଣ୍ଡାର ମଧ୍ୟରେ ପ୍ରବେଶ କରିବ ନାହିଁ ।

ରାଜ୍ୟ ସମେତ ସମଗ୍ର ଦେଶର ନଜର ଆଜି ଶ୍ରୀକ୍ଷେତ୍ରର ଏହି ଐତିହାସିକ କ୍ଷଣ ଉପରେ ରହିଥିଲା । ଗତକାଲି ରାତିରେ ‘ରତ୍ନଭଣ୍ଡାର’ ଖୋଲିବା ନେଇ ଅପରେସନ ମାନକ ନିର୍ଦ୍ଦେଶାବଳୀ ବା ‘ଏସଓପି’ ଜାରି କରାଯାଇଥିଲା । ଆଜି ସକାଳେ ପୁଣିଥରେ ଜଷ୍ଟିସ ରଥଙ୍କ ଅଧ୍ୟକ୍ଷତାରେ ଚୂଡାନ୍ତ ପ୍ରସ୍ତୁତି ବୈଠକ ବସିଥିଲା । ଏହା ପରେ ପାରମ୍ପରିକ ପୋଷାକରେ ନଜର ଆସିଥିଲେ କମିଟିର ଏକାଧିକ ସଦସ୍ୟ । ମାଦଳା ପାଞ୍ଜିର ବର୍ଣ୍ଣନ ଅନୁସାରେ, ଶ୍ରୀଜଗନ୍ନାଥଙ୍କ ଭଣ୍ଡାରର ରକ୍ଷକ ପ୍ରଭୁ ଶ୍ରୀ ଲୋକନାଥ ହୋଇଥିବା କାରଣରୁ ଲୋକନାଥଙ୍କ ପୀଠରୁ ଖୋଲାଯିବା ପାଇଁ ଆଜ୍ଞାମାଳ ମଧ୍ୟ ଶ୍ରମନ୍ଦିରରେ ପହଞ୍ଚିଥିଲା । ଏହା ପରେ ପ୍ରାୟ 12ଟା ସମୟରେ 11 ଜଣିଆ ଟିମ ମନ୍ଦିର ମଧ୍ୟକୁ ପ୍ରବେଶ କରି ପାରିପାର୍ଶ୍ବିକ ସ୍ଥିତି ଅନୁଧ୍ୟାନ କରିବା ସହ ନିର୍ଦ୍ଧାରିତ ମାହାର୍ଘ୍ୟ ମୁହୂର୍ତ୍ତକୁ ଅପେକ୍ଷା କରିଥିଲେ । ଅପରାହ୍ନ 1ଟା 28 ମିନିଟରେ ଏହି କମିଟି ରତ୍ନଭଣ୍ଡାର ଖୋଲି ଭିତରକୁ ପ୍ରବେଶ କରିଛି । ବାହାର ରତ୍ନଭଣ୍ଡାରର ଯାଞ୍ଚ ପ୍ରକ୍ରିୟା ଜାରି ରହିଥିବା ସୂଚନା ରହିଛି ।