ଲକ୍ଷାଧିକ ଟଙ୍କାର ଚୋରି ସାମଗ୍ରୀ ଜବତ, ୫ ଗିରଫ

ମୋ ଟିଭି ଓଡିଶା / ସମ୍ବଲପୁର : ସ୍ଥାନୀୟ ଅଇଁଠାପାଲି ପୁଲିସ ଗତ ଜୁନ ମାସରେ ହୋଇଥିବା ଏକ ଚୋରି ଘଟଣାରେ ୫ ଜଣଙ୍କୁ ଗିରଫ କରିବା ସହିତ ସେମାନଙ୍କଠାରୁ ଲକ୍ଷାଧିକ ଟଙ୍କାର ଚୋରି ସାମଗ୍ରୀ ଜବତ କରିଛି। ଅଭିଯୁକ୍ତମାନେ ହେଲେ ଉତ୍ତର ପ୍ରଦେଶ ଅମେଠି ଜିଲା ପିପାରପୁର ଥାନା ଅନ୍ତର୍ଗତ ମଣ୍ଡା ଗୋପାଲପୁର ନିବାସୀ ଫିରୋଜ ଅଲ୍ଲୀ (୩୨), ନୂଆପଡା, ମାଝୀପାଲି ନିବାସୀ ଆକାଶ ଦୀପ (୨୦), ଜନ୍ମୟ ସୁନା (୨୨), ଏନ.ଗୁହା ଲେନ ନିବାସୀ ଅବିନାଶ ମିଶ୍ର (୨୩) ଓ ବଲାଙ୍ଗୀର ଜିଲାର ମୂଳ ନିବାସୀ ତଥା ଏବେ ଶାନ୍ତି ନଗରରେ ରହୁଥିବା ଚିତ୍ର ସୁନା (୨୭) l ସୂଚନା ଅନୁଯାୟୀ, କ୍ଷେତରାଜପୁର ନିବାସୀ ସଚିନ କୁମାର ଅଗ୍ରୱାଲଙ୍କ ଏକ ଆଲୁମିନିୟମ ନିର୍ମାଣ ୟୁନିଟ ରହିଥିଲା । କିନ୍ତୁ କୌଣସି କାରଣରୁ ସେ ଉକ୍ତ ୟୁନିଟକୁ ବନ୍ଦ କରି ଦେଇଥିବା ବେଳେ ବିଭିନ୍ନ ଯନ୍ତ୍ରପାତିଗୁଡିକୁ ଅଇଁଠାପାଲି ଛକସ୍ଥିତ ଏକ ଗୋଦାମ ଘରେ ରଖିଥିଲେ। ଗତ ଜୁନ ୧୮ ତାରିଖ ରାତ୍ରିରେ ଯନ୍ତ୍ରପାତି ଚୋରି ହୋଇଥିବା ନେଇ ସେ ୧୯ ତାରିଖରେ ଜାଣିବାକୁ ପାଇଥିଲେ। ଉକ୍ତ ଗୋଦାମରୁ ପ୍ରାୟ ୬ ଲକ୍ଷ ୫୦ ହଜାର ଟଙ୍କାର ଯନ୍ତ୍ରପାତି ଚୋରି ହୋଇଥିବା ସେ ଅଇଁଠାପାଲି ଥାନାରେ ଅଭିଯୋଗ କରିବାରୁ ପୁଲିସ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା। ପ୍ରାୟ ୨ ମାସ ପରେ ପୁଲିସ ଅଭିଯୁକ୍ତମାନଙ୍କୁ ଗିରଫ କରିଛି । ସେମାନଙ୍କ ନିକଟରୁ ଗୋଟିଏ ଅଟୋ, ଗୋଟିଏ ସ୍କୁଟି, ୩ଟି ଲୁହା ଫ୍ରେମ, ଆଲୁମିନିୟମ ହାଣ୍ଡି ଓ ଅନ୍ୟାନ୍ୟ ସାମଗ୍ରୀ ଜବତ ହୋଇଛି।