ବିଶ୍ବକପ ଧରି ଭାରତକୁ ଫେରିଲା ଟିମ ଇଣ୍ଡିଆ;

ମୋ ଟିଭି ଓଡିଶା / ନୂଆଦିଲ୍ଲୀ :

ପ୍ରତିକ୍ଷାର ଅନ୍ତ ଘଟିଲା । ବିଶ୍ବକପ ଧରି ଭାରତକୁ ଫେରିଲା ଟିମ ଇଣ୍ଡିଆ । ବାର୍ବାଡସରୁ ବିଶ୍ବ ଚାମ୍ପିଅନ ଟିମକୁ ଧରି ଉଡାଣ ଭରିଥିବା ବିମାନ ଆଜି ଦିଲ୍ଲୀ ବିମାନବନ୍ଦରରେ ଅବତରଣ କରିଛି । ଖେଳାଳିଙ୍କୁ ସ୍ବାଗତ କରିବାକୁ ହଜାର ହଜାର ଦର୍ଶକଙ୍କ ଭିଡ ଲାଗିଛି ବିମାନବନ୍ଦରରେ । ଇଣ୍ଡିଆ… ଇଣ୍ଡିଆ… ନାରାରେ କମ୍ପୁଛି ଆଇଜିଆଇ ଏୟାରପୋର୍ଟ । ୧୭ ବର୍ଷ ପରେ ଭାରତକୁ ବିଶ୍ବକପ ଟ୍ରଫି ଆସିଛି । ବିଦେଶ ମାଟିରେ ଟିମ୍‌ ଇଣ୍ଡିଆ ବିଜଯୀ ହୋଇଥିବା ବେଳେ ଭାରତ ମାଟିରେ ଜମିଥିଲା ବିଜୟ ଉତ୍ସବ । ୧୪୦ କୋଟି ଭାରତୀୟ ଟିମ ଇଣ୍ଡିଆ ବିଜୟର ସେଲିବ୍ରେସନ କରିଥିଲେ । ଗତକାଲି ବାର୍ବାଡସରୁ ସ୍ବତନ୍ତ୍ର ଏୟାର ଇଣ୍ଡିଆ ବିମାନ ଖେଳାଳିଙ୍କୁ ଧରି ଦିଲ୍ଲୀ ଅଭିମୁଖେ ଉଡାଣ କରିଥିଲା। ଆଜି ଭୋର 6ଟା ସମୟରେ ବିମାନ ଅବତରଣ କରିଛି । ଏହାପରେ ଦିଲ୍ଲୀର ଆଇଟିସି ମୌର୍ଯ୍ୟ ହୋଟେଲକୁ ଯିବେ ସମସ୍ତ ଖେଳାଳି । ପୂର୍ବାହ୍ନରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଚମ୍ପିଆନ ଦଳକୁ ଭେଟିବାର କାର୍ଯ୍ୟକ୍ରମ ରହିଛି । ମୋଦି ଖେଳାଳିଙ୍କୁ ଭେଟି ଅଭିନନ୍ଦନ ଜଣାଇବେ ।