ମୁଖ୍ୟମନ୍ତ୍ରୀଙ୍କ କାରକେଡ ଆଗରେ ମହିଳାଙ୍କ ହାଇଡ୍ରାମା ଘଟଣା

ମୋ ଟିଭି ଓଡିଶା / ଭୁବନେଶ୍ୱର :

ମୁଖ୍ୟମନ୍ତ୍ରୀ ମୋହନ ମାଝିଙ୍କ କାରକେଡ ଆଗରେ ମହିଳାଙ୍କ ହାଇଡ୍ରାମା ଘଟଣାକୁ ନେଇ ବଡ଼ ସୂଚନା ଦେଇଛନ୍ତି ପୋଲିସ କମିଶନର। ପୋଲିସ କମିଶନର ସଂଜୀବ ପଣ୍ଡା କହିଛନ୍ତି, ରସୁଲଗଡ ରାସ୍ତାରେ ମୁଖ୍ୟମନ୍ତ୍ରୀଙ୍କ କାରକେଡ ଅଟକି ନାହିଁ। ମହିଳା ଜଣକ ଆଡ଼ଭାନ୍ସ ଟିମ ଆଗକୁ ଚାଲି ଆସିଥିଲେ। ମହିଳା ପୋଲିସ କର୍ମଚାରୀ ବୁଝାସୁଝା କରିବା ପରେ ସେ ରାସ୍ତାରୁ ହଟିଥିଲେ। ତେବେ କାହିଁକି ମହିଳା ଏଭଳି କଲେ ଏନେଇ ତଦନ୍ତ ଚାଲିଛି ବୋଲି କମିଶନର କହିଛନ୍ତି।

 ମଙ୍ଗଳବାର ସଂଧ୍ୟାରେ ଭୁବନେଶ୍ବର ରସୁଲଗଡ ଛକରେ ଅଚାନକ ଜଣେ ମହିଳା ଚାଲିଆସିବାରୁ କିଛି ସମୟ ପାଇଁ ଅଟକି ରହିଥିଲା ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ କାରକେଡ୍ । ମହିଳାଙ୍କୁ ପୁଲିସ ବୁଝାସୁଝା କରି ହଟାଇବା ପରେ କାରକେଡ୍ ପୁଣି ଯାତ୍ରା କରିଥିଲା । ମୁଖ୍ୟମନ୍ତ୍ରୀଙ୍କ ଗସ୍ତ ପୂର୍ବରୁ ସୁରକ୍ଷା ଦୃଷ୍ଟିକୁ ନଜରରେ ରଖି କଟକଣା ଜାରି କରାଯାଇଥିଲା । ଅନ୍ୟ ଗାଡିଗୁଡିକୁ କିଛି ସମୟ ଅଟକି ରହିବାକୁ ନିର୍ଦ୍ଦେଶ ରହିଥିଲା । କିନ୍ତୁ ଏହି ସମୟରେ ଉକ୍ତ ମହିଳାଜଣକ ରାଗିଯାଇ କାରକେଡ୍ ଆଗକୁ ଚାଲିଆସିଥିଲେ ଏବଂ କାହିଁକି ଅନ୍ୟମାନଙ୍କୁ ଏତେ ସମୟ ଅଟକାଯାଇଛି ବୋଲି ରାଗରେ କହିଥିଲେ । ଏଥିରେ କିଛି ସମୟ ମୁଖ୍ୟମନ୍ତ୍ରୀଙ୍କ କାରକେଡ୍ ଅଟକି ରହିଥିଲା । ପୁଲିସ ମହିଳାଙ୍କୁ ବୁଝାସୁଝା କରି ହଟାଇବା ପରେ କାରକେଡ୍ ଯାଇଥିଲା । ତେବେ ମହିଳାଙ୍କ ମେଡିକାଲ ସମ୍ବନ୍ଧୀୟ ଜରୁରି କାମ ଥିବାରୁ ଅନେକ ସମୟ ଅପେକ୍ଷା କରି ଶେଷରେ ଏମିତି କରିଥିବା ସେ କହିଥିଲେ ।