ପୁଣି ପଲଟି ମାରିବେ କି ନୀତୀଶ?

ଏନଡିଏ ଛାଡ଼ି ମହାମେଣ୍ଟକୁ ଫେରିବା ନେଇ ଚର୍ଚ୍ଚା ଜୋର ଧରିଛି । ଆରଜେଡି ମୁଖ୍ୟ ଲାଲୁ ପ୍ରସାଦଙ୍କ ବୟାନ ବିହାର ରାଜନୀତିରେ ନିଆଁ ଲଗାଇଛି । ୨୦୨୫ ଶେଷ ଆଡକୁ ଅଛି ବିହାର ବିଧାନସଭା ନିର୍ବାଚନ । ହେଲେ ତା ପୂର୍ବରୁ ହେବାକୁ ଯାଉଛି ବଡ଼ ଓଲଟପାଲଟ । ଲାଲୁ କହିଛନ୍ତି, କ୍ଷମା କରିବା ମୋ କାର୍ୟ୍ୟ। ଜେଡିୟୁ ମୁଖ୍ୟ ନୀତୀଶ କୁମାର ଯଦି ଫେରିଆସିବେ, ତାଙ୍କୁ ବିନା ଦ୍ୱିଧାରେ କ୍ଷମା କରିଦେବି। ସମସ୍ତେ ମିଳିମିଶି କାର୍ୟ୍ୟ କରିବୁ। ମୋ ଦ୍ୱାର ସବୁବେଳେ ନୀତୀଶଙ୍କ ପାଇଁ ଖୋଲା ରହିଛି। ନୀତୀଶ ମଧ୍ୟ ନିଜ ଦ୍ୱାର ଖୋଲା ରଖିବା ଉଚିତ। ଲାଲୁଙ୍କ ଏହି ମନ୍ତବ୍ୟକୁ ନେଇ ବିହାର ରାଜନୀତିରେ ଚର୍ଚ୍ଚା ଜୋର୍‌ ଧରିଛି। ତେବେ ଲାଲୁଙ୍କ ଏହି ଅଫରକୁ ପ୍ରତ୍ୟାଖାନ କରିଛନ୍ତି ନୀତୀଶ କୁମାର । ତେବେ ପୂର୍ବରୁ ଦଳ ବଦଳାଇବା ନେଇ ନୀତିଶଙ୍କ ନାଁରେ ରେକର୍ଡ ରହିଛି । ବର୍ଷ ଆରମ୍ଭରୁ ହିଁ ନୀତୀଶ ଦଳ ବଦଳାଇ ଦିଅନ୍ତି । ବାରମ୍ୱାର ଏମିତି କରିବାର ନଜିର ମଧ୍ୟ ରହିଛି । ତେଣୁ ଲାଲୁ ଯାଦବଙ୍କ ଅଫର ନୀତିଶ ଏନଡିଏ ଛାଡୁଥିବା ଚର୍ଚ୍ଚାକୁ ଖୋରାକ ଯୋଗାଇଛି ।

ବ୍ୟୁରୋ ରିପୋର୍ଟ : ମୋ ଟିଭି ଓଡିଶା